Фудбалерите на Олимпик Марсеј доживеаја неочекуван пораз од Нант со 0-2 на „Велодром“, во натпревар од 17-тото коло во француската Лига 1.
Нант уште од првите минути покажа поголема сигурност од домаќинот. Веќе по осум минути игра, „Велодром“ воздивна со олеснување откако автоголот на Си-Џеј Иган-Рајли беше поништен.
Клучниот момент се случи во 26-тата минута, кога Андреас Фермерен направи целосно непотребен прекршок врз голманот на Нант, Антони Лопеш. Во обид за пресинг, младиот Белгиец стартуваше со отворен ѓон и заработи директен црвен картон поради крајно непромислен потег.
Казната стигна брзо. Во 31-та минута, Фабиен Сентонз погоди и го замолкна „Велодром“ за водство од 0-1.
Но, тука не завршија проблемите за тимот на Де Зерби. Билал Надир, кој влезе во првото полувреме наместо Игор Паишао со цел да донесе рамнотежа, беше исклучен во 56-тата минута откако доби два жолти картони за само три минути.
За целосен кошмар се погрижи Бенжаман Павар, кој во 86-тата минута направи пенал. Одговорноста ја презеде Реми Кабела, кој против својот поранешен клуб го постави конечниот резултат.
Со вакви настапи, Олимпик Марсеј реално нема што да бара во трката за шампионската титула. Ленс веќе се оддалечи на осум бода разлика, а кризата во Марсеј станува сè поочигледна.
