Италијанскиот шампион Наполи постигна договор со крилниот играч на Манчестер јунајтед, Џејдон Санчо. Според информациите, 25-годишниот англиски репрезентативец дал согласност да се пресели на стадионот „Диего Армандо Марадона“, но трансферот сè уште не е финализиран поради недоразбирања меѓу двата клуба.
Манчестер јунајтед инсистира да добие 25 милиони евра за своето крило и покрај тоа што договорот со Санчо истекува во 2026 година. Наполи смета дека сумата е превисока и во моментов не е подготвен да ја исплати целосно, поради што преговорите продолжуваат.
Санчо минатата сезона играше како позајмен фудбалер во редовите на Челзи, каде што во 42 натпревари постигна пет гола и запиша 10 асистенции. И покрај солидната статистика, Сините од Лондон решија да не го откупат неговиот договор, плаќајќи пет милиони фунти за едногодишната позајмица.
Англичанецот во својата кариера настапуваше и за Борусија Дортмунд, каде што го имаше својот најдобар период пред да се врати во Премиер лигата во 2021 година.
