Макаби Хаифа и Црвена ѕвезда вечерва од 21 часот во Израел го играат првиот меч од плејофот за влез во групите од Лигата на шампионите, а патникот во ЛШ ќе се одлучува на реваншот во Белград, затоа и фановите на Макаби сакаат масовно да заминат во српскиот главен град и да му помогнат на својот тим.
Ѕвезда веќе ги пушти билетите во продажба, но ја смени вообичаената пракса. Овојпат Црвено-белите билетите ги пуштија многу порано од вообичаено, и тоа на денот на одигрување на средбата со Вождовац во саботата и само на благајната на стадионот „Рајко Митиќ“, со приложување на лична карта.
Од клубот прво известија дека нема да има онлајн продажба на билети на дуелот со Макаби, а потоа пуштија и онлајн, но под еден услов, купувачот да е државјанин на Србија.
Онлајн билети не се продаваат за јужната трибина откако во Ѕвезда дознале дека навивачи на Макаби планираат да купат голем број билети за таа трибина, за местата околу оградениот дел наменет за гостински фанови. Според правилата на УЕФА, на гостите им следуваат билети за 5 отсто од капацитетот на стадионот.
