Лос Анџелес лејкерс бил оштетен од судиите во две ситуации во финишот на петтиот меч од големото НБА финале против Мајами хит, потврдија од НБА лигата. Судиите во последните 61 секунди донеле две погрешни одлуки на штета на Езерџиите, и тоа не за спорните ситуации за кој играчите приговараа кај судиите.
Лејкерс води со 3-2 во финалето и доцна вечерва ја има втората шанса да се закити со 17-тиот шампионски прстен, со што клубот од Лос Анџелес би се изедначил со Бостон селтикс.
Во Лејкерс после петтиот меч се жалеа што судиите му „подариле“ четири слободни фрлања на Џими Батлер, но за НБА, тоа биле добри одлуки на судиите. Судиите грешеле во други две ситуации.
Најпрвин, на 1,01 минута до крајот, Леброн Џејмс беше во продор, и чуван од Батлер кој со десната рака имал контакт со главата на Џејмс, и според НБА, требало да се досуди лична грешка и ѕвездата на Лејкерс да оди на линијата за слободни фрлања. Џејмс утна, но со офанзивен скок ја фати топката и погоди за 106-105.
Потоа, на 28 секунди до крајот, повторно Лејкерс биле оштетени од судиите. На Андре Игудала од Мајами требало да ми се досудат дефанзивни три секунди, бидејќи долго стоел во рекетот без активно да чува противнички играч. Тој напад на Лејкерс заврши со утка на Колдвел Поуп и офанзивен скок на Ентони Дејвис кој даде кош за 108-107 на 21,8 секунди до крај.
Ова значи дека грешките на судиите и не влијаеле директно врз конечниот резултат. Во следниот напад на Мајами, фаулиран беше Батлер и првакот на западната конференција најмногу се бунеше за тоа, бидејќи според нив немало прекршок.
