Македонија се врати во игра за настап во квалификациите за учество на Мундијалот во 2023 година, а нашите кошаркари ја победија Словачка со 69:47 и приредија вистинско шоу во последната четвртина.
Имавме неверојатна серија од 20:0 во која Словачка не успеа да ни даде поени цели 7 минути. Успеаја да уфрлат само 5 поени во период од 10 минути што го добивме со 23:5 за убедлив прв триумф во претквалификациите што се играат во Скопје.
По поразот од Швајцарија со 62:67 избраниците на Драган Бајиќ одиграа многу подобро и ја декласираа Словачка.
На почетокот на вториот период ја имавме најголемата разлика во првото полувреме од 28:12, а на одмор заминавме со предност од 35:24.
Словачка беше подобра во третата четвртина, намали на само четири поени разлика, но потоа се случи кошаркарското чудо во „Борис Трајковски“ и серијата од 20:0 за Македонија што траеше до три минути пред крајот на мечот.
Капитенот Бојан Трајковски беше најефикасен на мечот и постигна 16 поени и имаше 8 скока. Мекиќ и Вајли постигнаа по 12 поени и искомбинираа 11 скока заедно. Николов одигра одлично и имаше шест асистенции, најмногу на мечот, а три од нив беа во НБА стил за забивања на Вајли.
Сите три селекции што играат во Скопје имаат по една победа и пораз, а вториот круг што пак се игра кај нас ќе почне задутре.
