Јирген Клоп потпиша нов договор со Ливерпул според кој германскиот стратег ќе остане на „Енфилд роуд“ до јуни 2026 година. Договорот на Клоп беше до јуни 2024 година, а според пишувањата на дел од светските медиуми, постигнат е договор за соработка кој ќе го задржи на чело на клубот и во следните четири сезони.
Клоп во Ливерпул дојде во октомври 2015 година и успеа клубот да го однесе на врвно ниво. Со него на чело, Ливерпул по пауза од 30 години, повторно ја освои Премиер лигата, а се радуваше и на титула во Лигата на шампионите. Сезонава, Ливерпул има историска шанса за неверојатен подвиг и во една сезона да освои четири трофеи.
Во витрините на „Енфилд роуд“ веќе е трофејот од Лига купот, ќе играат во финалето во ФА купот, а се на чекор од финалето и во Лигата на шампионите. Во Премиер лигата, Ливерпул е во трка со Манчестер сити за освојување на шампионскиот трофеј.
