Досегашниот прв човек на КК Црвена ѕвезда, Небојша Човиќ, од денеска е претседател на Кошаркарскиот сојуз на Србија. Човиќ ја презеде функцијата од Предраг Даниловиќ, кому му истече мандатот.
На денешната седница на Кошаркарскиот сојуз на Србија (КСС), Небојша Човиќ беше избран за нов претседател. Резултатот од гласањето беше – 28 гласа „за“ и еден „воздржан“.
„Ви благодарам за довербата. Пред нас е интересен период – олимписки циклус. Треба да го продолжиме континуитетот на Собранието. Ни претстојат квалификации, Европско првенство… Потребно е да создадеме заеднички пристап, без оглед на разликите. Првата задача е да го решиме прашањето за селекторот“, изјави Човиќ, алудирајќи да се продолжи соработката со Светислав Пешиќ.
Тимот на Човиќ во КСС ќе биде составен од четири потпретседатели, Ана Јоковиќ, која ќе биде одговорна за женската кошарка, Ненад Крстиќ за машката кошарка, Дарко Јовичиќ за натпреварувањата и Филип Сунтурлиќ за финансии и маркетинг.
