Минималната победа од 1-0 против Ипсвич, го искачи Арсенал на второто место на премиерлигашката табела со шест бода помалку од лидерот Ливерпул кој има и еден меч помалку.
Каи Хаверц беше стрелец на единствениот гол.
Ипсвич кој 45 години не победил на лигашко гостување кај Арсенал, вечерва беше тотално немоќен, не шутна ниеднаш во рамки на голот и како да беа во Лондон со цел да загубат со што помала разлика.
Ни Топчиите не се прославија, иако постојано ја имаа топката во свои нозе. Нивните напади беа претежно јалови, тимот на менаџерот Микел Артета не реализираше неколку шанси, па на крај мораа да се задоволат со 1-0 и да се плашат во финишот да не бидат шокирани.
