Бразилскиот репрезентативец Нејмар, неславно ја заврши одисејата во Саудиска Арабија, поради тешка повреда на лигаментите на коленото, сезоната ја заврши уште во октомври минатата година, и следна дестинација во кариерата сака да му биде Интер Мајами каде повторно би играл заедно со Лионел Меси.
Нејмар моментно се опоравува од операцијата во Бразил, а медиумите пишуваат дека наскоро ќе го раскине договорот со Ал-Хилал и ќе ја продолжи кариерата таму каде што „го влече срцето“, МЛС-лигата и Интер Мајами.
Тој воопшто не крие дека со задоволство би им се приклучил на поранешните соиграчи, Лионел Меси, Луис Суарес, Серхио Бускетс и Жорди Алба во Интер Мајами.
„Се надевам дека повторно ќе играме заедно. Лео е прекрасна личност, мислам дека е среќен во Мајами, па и јас сум среќен поради него“, изјави Нејмар кој со Меси, освен во Барселона, играше заедно и во ПСЖ.
Нејмар минатото лето потпиша двегодишен договор со Ал-Хилал за годишна плата од 200 милиони евра, но одигра само пет меча и постигна само еден гол пред да доживее тешка повреда која најверојатно ќе му овозможи предвремен раскин на договорот.
