Нејмар повторно ја докажа својата класа постигнувајќи гол и асистенција во многу важната победа на Сантос против Спорт Ресифе во меч од бразилското првенство. За Сантос ова е многу важна победа затоа што тимот имаше само 38 бодови и се наоѓаше во зоната за испаѓање, а сега со овие три бодови, скокна на 15-тото место и е во сигурната зона.
Сантос е екипата на Нејмар од детството, а фудбалерот со одлуката да игра и да биде главен играч на теренот, само потврди колку го сака овој клуб. Пред само неколку дена беше соопштено дека Нејмар има повреда на менискусот на коленото и дека тој нема да може да игра до крајот на 2025 година.
Сепак, Нејмар реши да не ги слуша лекарските наоди и одлучи да игра за Сантос во еден од најважните мечеви. На теренот тој беше главен играч, откако постигна гол во во 25 минута за водство од 1:0, а потоа асистираше за погодокот на Жоао Шмит во 67 минута што беше за 3:0.
До крајот на првенството во Бразил остануваат уште две кола, а на Сантос му останува грчевита борба да не испадне.
