Првиот човек на Реал Мадрид, Флорентино Перез, го тешеше капитенот Лука Модриќ при доделувањето на трофејот по тешкиот пораз на Реал од Барселона во финалето на Суперкупот од 2-5.
Камерите го фатија Перез како му вели на Хрватот: „Понекогаш мораме да загубиме финале, нели?“
Во Кралскиот клуб не се навикнати да губат финалиња, а синоќешниот пораз е посебно болен затоа што беше од ривалот Барселона и што тимот одигра лоша одбрана и прими пет гола. Претходното финале во кое Реал примил 5 гола беше во 2007 година против Севилја, истотака во шпанскиот Суперкуп.
Модриќ пак за медиумите изјави дека ова е фудбал и има победи и порази.
„Никогаш не е убаво да се загуби, но ако треба да се избере пораз во финале, тогаш подобро во Суперкупот. Разочарани сме, жал ни е и за навивачите. Не е убаво кога најголемиот ривал ти дава 9 гола на два меча. Мора да им честитаме, тие беа подобри и тоа е тоа“, рече Модриќ по натпреварот.
