Унгарија славвеше над Холандија со 36:32 во дербито од третото коло во групата во која е и Македонија. Унгарија со оваа победа си обезбеди да е прва во групата со пет бодови, пред Холандија со 4, Македонија има три и Гвинеја без бодови.
Холандија добро го отвори мечот и имаше постојано водство до 10:9. Потоа Унгарија со многу подобра игра стигна до 16:13, а на полувреме замина со два гола предност (19:17). Во вториот дел Унгарците постојано имаа водство. холандија стигна до 33:32, но во клучните моменти Унгарија со серија од 3:0 стигна до победа од четири разлика.
Шокантно трето коло имаше за ко-домаќините Хрватска и Норвешка. Коцкестите во Загреб беа надиграни од Египет и загубија со 28:24. Египет уште на стартот поведе со 2:0, потоа и со 6:2 и во текот на целиот меч имаа водство, па на крајот заслужено победија.
Норвешка е најнепријатното изненадување во досегашниот дел откако го претрпе вториот пораз во групата. По поразот од Бразил, во првото коло, Норвешка вечерва на свој терен во Осло загуби и од Португалија и тоа со 28:31. Тоа значи дека Норвешка во главната групна фаза ќе влезе без ниту еден бод и речиси никакви шанси да се надева за место во четвртфиналето.
Според распоредот, Македонија во вторник ќе игра против Австрија, потоа на 23 јануари противник ќе ни биде Катар, а на 25 јануари во последното коло ќе вкрстиме со фаворитот Франција.
По мечевите во првата групна фаза јасно е дека Франција ќе стартува со 4 бодови, постоа Унгарија со 3, Холандија со 2, Австрија со два бода, Македонија со еден бод и Катар без ниту еден бод.
