Кошаркарите на Олимпија Милано по фантастичната победа на домашен терен над Панатинаикос, неочекувано високо загубија од Баерн Минхен со 87-70. Баварците беа фаворити, но веројатно ретко кој очекуваше ваква лесна и убедлива победа.
Македонскиот репрезентативец Ненад Димитријевиќ на паркетот мина 11 минути и 43 секунди и успеа да постигне осум поени, а имаше и две асистенции. Нено имаше три од пет за два поена, нула од еден за три и два од два од линијата за слободни фрлања.
Сепак и покрај високиот пораз, во првото полувреме се играше рамноправно, а на паузата Баерн Минхен имаше предност само од еден поен, 37-36. Мечот беше одлучен во третата четвртина, кога Баварците со серија од 10-0 го скршија отпорот на противникот и го добија периодот со 31-19.
Олимпија Милано сега ја очекува жестока битка за влез во плејин-разигрувањето, односно за влез помеѓу најдобрите 10 екипи во евролигата.
