Реал Мадрид се соочува со два проблема, а утре е „Денот Д“ кога ќе се знаат одговорите на две прашања кои ги мачат Кралевите.
Утре УЕФА треба да донесе одлука дали и какви казни ќе има за играчите на Реал кои беа пријавени од Атлетико Мадрид за неспортска прослава на победата во осминафиналето на Лигата на шампионите. Наводно во Реал се плашат дека Антонио Ридигер може да добие суспензија од еден меч и да не игра на првиот дуел со Арсенал од четвртфиналето. За останатите тројца (Винисиус, Мбапе и Себаљос), кои се „под лупа“, веруваат дека ќе минат само со парични казни и условна суспензија.
Шпанските медиуми објавија уште една непријатна работа за Реал, а тоа е дека мускулен проблем има голманот Андриј Лунин. Украинецот бранеше 120 минути на натпреварот против Реал Сосиедад во Купот, но има повреда поради која можеби ќе го пропушти мечот со Валенсија в сабота попладне, средба на која требаше да биде стартер, со оглед на тоа дека првиот голман Тибо Куртоа уште не е фит и не сакаат да ризикуваат со него, па клубот сака да го поштеди за мечот со Арсенал во вторник.
Во моментов делува дека третиот голман Фран Гонзалес ќе добие шанса да биде на голот на Реал на мечот со Валенсија. Фран има 19 години, висок е 1,98 метри, а сезонава има 16 настапи за Реал Мадрид Б и се наоѓа во натпреварувачка форма.
