Деветгодишно дете, фан на Дерби каунти, испрати писмо до клубот во кое аплицира за тренерското место. Малиот Тоби Хол во писмото објаснува дека има големи планови врзани за клубот. Тој најави и каква тактика ќе применува ако добие шанса да седне на клупата и дека тој чуден систем (1-3-3-2-1) ќе им помогне да се пласираат во Премиер лигата.
Дерби е без тренер откако неодамна Филип Коку доби отказ, па играчот Вејн Руни привремено ја врши и тренерската функција.
„Би сакал да аплицирам за нов менаџер. Добро играм фудбал, а на компјутер играм ФИФА 21 во режим на тренер“, напиша Тоби во писмото до сопственикот на Дерби, Мел Морис.
Како дополнување во понудата, Тоби пишува дека ако стане тренер, баба му ќе ги пере дресовите на играчите. Освен Тоби, кандидати за тренерското место во Дерби се и Џон Тери (втор тренер во Астон вила), легендата на Челзи, и Еди Хаув (екстренер на Борнмут).
