Првите три дена од фудбалското натпреварување Копа Америка кое се игра во Бразил донесоа победа на домашните, кикс на Аргентина, прекрасен гол на Кавани, но и еден неславен рекорд во делот на посетеноста на мечевите.
Празните трибини не се нешто што се очекува кога силите си ги одмеруваат националните тимови од Јужна Америка. Освен на мечот Бразил – Венецуела, кога на отворањето на Копа имаше 46 000 луѓе (но и тоа е слабо, ако се знае дека капацитетот на стадионот е 66.000), на другите средби посетата е катастрофална.
Катар и Парагвај играа пред 19 илјади луѓе на трибините, и тоа на славната „Маракана“, која има 74.000 седишта. Од тие 19 илјади, четири илјади беа деца од локални основни учличишта. Уругвај и Еквадор ги гледа 13.000, а слаби се и оние 35.000 на дербито Аргентина – Колумбија.
Вината се бара кај организаторите, бидејќи цените на билетите се огромни за бразилски прилики. За првиот меч на Бразил, најефтините влезници чинеа 151 долар, што е повеќе од половина минимална плата, а цената на билетите за финалето се 230 долари, колку што изнесува и минималната плата во Бразил.
Друга причина е презаситеноста на Бразилците. Оваа земја од 2014 година наваму беше домаќин на Светско првенство во фудбал, па Олимписките игри и сега Копа Америка.
