Николоз Басилашвили и Феликс Ожие-Алијасим денеска од 17 часот со третиот меѓусебен меч во кариерите ќе означат рестарт на машкиот професионален тенис, по пауза од половина година.
Турнирот од Мастерс серијата Синсинати 2020 овојпат ќе се игра во Њујорк, поради безбедносни причини во ерата кога се уште не е сопрена пандемијата со корона-вирус, а во истиот термин на комплексот „Флешинг Медоуз“ ќе се играат уште два меча.
Ожие-Алијасим води со 2:0 во меѓусебните дуели со Грузиецот, кој куртули од затвор во мај годинава, отако сопругата го пријави за насилство во Тбилиси.
Најдобриот тенисер од оваа земја ја претепал сопругата на 21. мај, а очевидец бил и нивниот син. Следниот ден беше приведен и му се закануваше едногодишна казна затвор, но тенисерот беше пуштен на слобода со кауција од 29 илјади евра.
