Сан Антонио спарс се избори за седми меч против Денвер нагетс, откако на свој терен славеше со 120-103 и изедначи на 3-3 во серијата од плејофот на западната конференција во НБА лигата која се игра во четири добиени натпревари.
Иако Никола Јокиќ даде 43 поени за Денвер, што е клупски плејоф рекорд, сепак Спарс предводени од Ламаркус Олдриџ кој даде 18 поени во првото, и Демар Дерозен кој уфрли 18 во второто полувреме, „мамузите“ дојдоа до триумфот. На крај, Олдриџ и Дерозен заедно имаа 51 поен, 17 скока и 12 асистенции, а од клупата за резерви придонес од 19 поени даде Руди Геј.
Јокиќ кој имаше и 12 скока и девет асистенции, рече дека веројатно ова му е најдобра игра во кариерата, но џабе кога загубиле, а тој за првпат ќе игра еден седми меч од НБА плејоф, и се плаши дека неискуството може да им биде проблем. Резервите на Спарс дадоа 36, а тие на Нагетс само 13 поени, и тука е една од причините за резултатот.
„Моравме да бидеме агресивни, знаевме дека овој меч е да се биде или не. Игравме дома, и го направивме тоа што требаше. Плејофот е најинтересен поради тие седми натпревари, се живее за такви мечеви“ – рече Дерозен.
Мајсторката ќе се игра во Денвер, а победникот, во второ коло ќе се сретне со Портланд.
