Бобан Николов смета дека Полјаците многу среќно дошле до победата и дека ваквите порази во добра игра, болат повеќе од тие кога тимот ви бил целосно надигран.
„Боли тоа што иако покажавме добар фудбал, публиката што дојде мислам дека не зажали, дадовме максимум, но го загубивме мечот. Игравме храбро, без респект, но тоа е фудбалот. Левандовски ја утна топката и тоа беше пресудно, ако ја шутнеше, мислам дека Столе ќе одбранеше. Сега треба да го заборавиме овој пораз и со нови сили да се обидеме да ја победиме Австрија. Не чека нов важен натпревар. Не е лесно да заборавиш после пораз на ваков начин. Ако играме како денеска, сигурно можеме да ја совладаме Австрија. Вечерва среќата ни го сврте грбот, се надевам дека во понеделник ќе биде на наша страна“ – рече Бобан Николов.
