Во терминот од 15 часот беа одиграни три натпревари од 32-то коло на англиската Премиер лига, а беа постигнати следниве резултати: Сандерленд – Тотенхем 1-0, Нотингем Форест – Астон Вила 1-1 и Кристал Палас – Њукасл 2-1.
Роберто Де Ѕерби денес дебитираше на „жешката“ клупа на Тотенхем и не успеа да ја прекине катастрофалната серија на клубот, кој веќе 14 натпревари по ред не знае за победа во домашното првенство.
Тотенхем е под „линијата“ и сега има два бода помалку од зоната на опстанок, па сериозно му се заканува испаѓање во Чемпионшип.
Италијанскиот стратег излезе со офанзивен тим со Рандал Коло Муани, Ришарлисон и со Доминик Соланке, но тоа не донесе резултат.
На почетокот Тотенхем напаѓаше без ефект, а подоцна Црните мачки постепено ја презедоа контролата и стигнаа до водство во 61-та минута.
Мукиеле продре од десната страна, се намести за удар од околу 20 метри, топката го погоди Мики ван де Вен, го измами голманот Андреј Кински и заврши во мрежата за 1-0.
За Тотенхем ситуацијата дополнително се влоши поради повредата на капитенот Кристијан Ромеро, кој го напушти теренот во солзи, а неговиот настап до крајот на сезоната е под знак прашалник.
Во Нотингем, Форест и Астон Вила ремизираа 1-1, резултат кој не задоволи никого.
Нотингем Форест е на +3 во однос на Тотенхем и го очекува тежок финиш на сезоната, додека Астон Вила е четврта со 55 бодови, но сè уште не е сигурна во топ 5 и пласман во Лигата на шампионите.
Гостите поведоа со автогол на Мурило Серафим во 23-та минута, по остар центаршут на Морган Роџерс.
Шумарите израмнија во 38-та минута, кога Хадсон-Одои од казнениот простор врати топка до работ на шеснаесетникот, од каде Нико Вилијамс прецизно погоди за 1-1.
