Ветеранот Мануел Нојер е блиску до враќање во составот на Баерн, но тренерот Венсан Компани сè уште не може со сигурност да потврди дали ќе биде подготвен за претстојниот „Дер Класикер“ против Борусија Дортмунд во Бундеслигата.
Според Компани, 39-годишниот голман закрепнал од повредата на листот побрзо од очекуваното, но конечната одлука ќе биде донесена непосредно пред натпреварот.
„Може да тренира со нас, а потоа ќе разговараме повторно во часовите пред мечот. Сè оди во позитивна насока, но можно е да не биде подготвен за настап. Во постојан контакт сме со Ману, но доколку не е целосно подготвен, ќе брани Јонас Урбиг, кој секогаш одлично го заменувал“, изјави Компани.
Саботното дерби би можело да биде и последно во кариерата на Нојер против најголемиот ривал доколку не го продолжи договорот со Баерн по завршувањето на сезоната.
Минхенскиот гигант влегува во пресметката со осум бода предност во однос на Борусија Дортмунд, а со триумф на гостински терен би можело значително да се доближи до титулата на десет кола пред крајот на шампионатот. Баерн нема пораз на овој стадион од 2018 година.
„‘Дер Класикер‘ е титула сама по себе. Овие натпревари имаат посебна тежина и заслужуваат сопствен трофеј. Тоа се мечевите поради кои се игра фудбалот. Не е Дортмунд против кого било, туку Дортмунд против Баерн. Во мојата глава постои само победа. Можноста да славиме таму е најголем предизвик за мене“, истакна белгискиот стратег.
