Кошаркарите на Лос Анџелес лејкерс стигнаа до шестата победа во последните седум кола, откако утрово славеа над ослабениот Шарлот со 121:111. Лука Дончиќ со 38 поени беше најдобар на теренот и предводник на Лејкерси до триумфот.
Словенецот погоди пет тројки и неколку атрактивни потези, а навивачите посебно беа воодушевени кога реши да забие со двете раце, што предизвика овации на трибините. Клучниот период во мечот беше третата четвртина која тимот од Лос Анџелес ја доби со убедливи 31:15, а јунак во тој дел беше Руи Хачимура постигнувајќи 13 поени за победничкиот тим.
Шарлот на овој меч настапи без Ламело Бол и Брендон Милер, но повторно даде силен отпор на фаворитот. Мајлс Бриџис со 34 поени (седум тројки) беше прв стрелец кај поразениот тим.
Дончиќ оваа сезона има просек од 37,0 поени, 10,0 скока и 9,5 асистенции по натпревар. Неговата најдобра сезона досега беше во сезоната 2023/24 кога играше за Далас Маверикс, со просек од 33,9 поени (највисок во лигата), 9,2 скока и 9,4 асистенции по натпревар.
Резултати од мечевите кои се одиграа утрово во НБА лигата: Шарлот – ЛА Лејкерс 111:121, Детроит – Вашингтон 137:135, Орландо – Портланд 115:112, Мајами – Кливленд 140:138, Чикаго – Свети Антонио 117:121, Далас – Милвоки 114:116, Феникс – Њу Орлеанс 121:98, Јута – Минесота 113:120 и ЛА Клиперс – Атланта 102:105.
