Репрезентацијата на Црна Гора го доживеа и вториот убедлив пораз на Европското кошаркарско првенство, откако загуби од Литванија со 94-67. За разлика од нив, Литавнија дојде и до втората убедлива победа откако во првото коло славеше над Велика Британија.
Литванија ги доби сите четири периоди, а кој ќе биде победник на овој меч беше решено уште во првата четвртина која ја добија со +11 поени разлика.
Многу повеќе возбудувања имаше на балтичката пресметка помеѓу Естонија и Летонија. Иако Летонците беа големи фаворити за победата, сепак мораа прописно да се помачат за да дојдат до неа. Естонија имаше водство од 42-38 на полувремето, но Летонија направи пресврт во третата четвртина.
Балтичките ривали посебно се истакнаа со неефикасноста во последната четвртина, па во првите пет минути не постигнаа ниту поен, а за седум минути игра уфрлија само два поени. На крајот Летонија славеше со 72-70, а во последната четвртина беа постигнати само 18 поени (9-9).
