Женската ракометна репрезентација на Македонија до 19 години доживеа нов, четврти по ред, пораз на Европското првенство во Романија. Денес поуспешни беа младите ракометарки од Норвешка, кои победија со 23-29.
Македонија го одигра веројатно најдоброто полувреме на ова првенство, со оглед на тоа дека имавме водство од 11-9 на полувреме, но во вториот дел следуваше вистински дебакл. Норвешка тргна фуриозно и на самиот старт не само што направи пресврт, туку дојде и до убедливо водство кое до крајот на мечот успеваше да го одржи.
Најефикасна во нашите редови беше Марија Јанкуловска со 9 гола, додека кај Норвежанките најпрецизна беше Пиа Гронстад со 6 погодоци.
Следниот натпревар за нашите младинки ќе биде утре со почеток во 12 часот против репрезентацијата на Србија, во рамките на разигрувањето за пласман.
