Титулата во Бундес лигата полека но сигурно патува кон Леверкузен, со оглед на тоа дека Баерн Минхен вечерва доживеа нов срам и со пресврт загуби од Бохум со 3-2. Баер Леверкузен сега има предност од осум поени и само чудо може да ги спречи да не дојдат до титулата.
Дуелот со Бохум започна одлично за Баерн Минхен и веќе во 14-тата минута со голот на Мусиала, „баварците“ имаа водство од 0-1.
Шокот за Баерн Минхен следуваше уште во првото полувреме, бидејќи Бохум во 38-мата минута израмни преку Асано, а во 44-тата минута со голот на Шлотербек веќе 2-1 за домашните.
Во 78-мата минута Упамекано доби црвен картон, втор натпревар по ред, откако во вторникот беше исклучен и против Лацио во Лигата на шампионите, и веројатно ќе биде еден од „најзаслужните“ доколку Тухел добие отказ после денешниот дебакл.
Црвениот за Упамекано, значеше и пенал за Бохум, а сигурен реализатор за водство од 3-1 беше Стогер. До крајот на мечот Баерн Минхен успеа само да го намали водството на домашните преку Хари Кејн во 87-мата минута.
