Англија вечерва гостува кај Република Ирска на стадионот „Авива“ во Даблин во нивниот прв натпревар од Лига Б во Лигата на нации и тоа ќе биде прв натпревар за привремениот селектор на Трите лава, Ли Карсли, кој го замени Герет Саутгејт.
Карсли предизвика бран контроверзии пред неговото дебито денес. Причината е што најави дека нема намера да ја пее националната химна „Боже чувај го кралот“. Карсли, кој е роден пред 50 години во Бирмингем, има ирски корени и одиграно 39 натпревари за Ирска.
„Пеењето на националната химна е нешто со кое секогаш се борев кога играв за Ирска. Тој јаз помеѓу вашето загревање, одењето на теренот и забавувањето со химните, тоа е нешто што никогаш не сум го направил. Секогаш бев фокусиран на играта и на моите први акции на мечот. Во целост ги почитувам двете химни и разбирам колку значат за двете земји, но размислувам за тоа како ќе се постави противникот и нашите први акции на натпреварот“, изјави Карсли.
Објаснувањата на Карсли не беа добро прифатени од медиумите во Англија, некои остро ги критикуваа неговите изјави, па дури и побараа да биде отпуштен. Тие потсетуваат дека покојниот Свен-Горан Ериксон ја пееше химната, а беше странец.
