Џејкоб Вајли (26 години- 203 сантиметри), кошаркарот на шпанскиот АCB-лигаш Гран Канарија, ќе биде во конкуренција за едно од 12-те места во репрезентацијата на Македонија на претстојниот квалификациски турнир во Естонија.
И дефинитивно процедурата за неговото добивање македонско државјанство е завршена навреме и тој е веќе регистриран во канцеларијата на ФИБА.
„Во оваа прилика сакам да му се заблагодарам на претседателот на Федерацијата, Перо Антиќ, за можноста и за честа која ми е укажана од нивна страна! Јас сум многу благодарен за можноста да помогнам во претставувањето на Македонија заедно со националниот тим. И кога ми беше презентирана идејата да играм за оваа кошаркарска земја, не се двоумев да кажам да. Сакав да учествувам во ова“, за сајтот на КФСМ изјави Вајли по доаѓањето во Скопје, каде што во текот на денот требаше да ги заврши оние неопходни формалности за добивање на македонската патна исправа.
Џејкоб го имаше првиот индивидуален тренинг во СРЦ „Кале“, а од првиот ден од наредната седмица треба да се приклучи на нашиот национален тим. Вели дека не ги познава своите нови колеги во националниот тим, како и селекторот. Но во тоа не гледа никаков проблем.
„Не сум се сретнал со нив, секако поради овие околности во коишто живееме во изминатиот период. Но јас сум доста адаптабилен тип. Мислам дека брзо ќе воспоставиме добри вибрации со соиграчите. Очекувам и јас и моите соиграчи да го дадеме последниот атом на енергија, да вложиме максимален напор и да тргнеме во она што од нас се бара – да победуваме!“, дополни новиот Македонец.
Вајли има и НБА-искуство, и тоа во дресот на Бруклин нетс, тимот за којшто одигра пет меча во 2017 година. Наредното лето играше и за Далас маверикс во летната лига. Крилен центар треба да ја пополни позицијата „четири“, на која досега од натурализираните кошаркари ги имавме на располагање Ричард Хендрикс и Шејн Витингтон, кои сега играат во Јапонија и кои поради строгите здравствени процедури во „земјата на изгрејсонцето“ не се во можност да настапуваат во „црвено-жолтиот“ дрес на нашиот национален тим.
