Во јуни оваа година ќе се организира неофицијално Светско првенство за фудбалери кои наполниле 35 години. Првото издание ќе се одржи во Англија, а ќе биде во организација на Elite Players Group и ќе го носи името ЕПГ куп.
На Светското првенство се очекува да настапат голем број фудбалски ѕвезди, а ќе учествуваат осум репрезентации, и тоа: Аргентина, Бразил, Франција, Германија, Италија, Уругвај, Англија и Шпанија, односно осум поранешни светски шампиони.
Натпреварите ќе траат по 70 минути, секоја репрезентација ќе има по 18-мина играчи во ростерот, а измените ќе бидат летечки.
Од она што е досега потврдено, за Англија ќе настапат Стив Мекманам, Мајкл Овен, Фанк Лампард и Роби Фаулер, додека за Аргентина учеството го потврдија Естебан Камбијасо, Хернан Креспо и Пабло Забалета.
За Бразил би требало да настапат Кака, Роналдињо и Ривалдо, додека Франција ќе биде предводена од Кристијан Карембу, Тиери Анри и Марсел Десаи. Боите на Германија ќе ги бранат Кевин Курањи, Месут Озил и Сами Хедира, додека за Италија ќе играат Марко Матераци, Фабио Канаваро и Франческо Тоти.
Шпанија со сигурност во своите редови ќе ги има Мичел Салгадо, Давид Виља и Карлес Пујол бидејќи овие играчи веќе го потврдија учеството, а кај Уругвај потврдени се Диего Лугано и Диего Форлан.
