Њукасл е подготвен да му понуди на Маркус Рашфорд нова иднина во Премиер лигата и настапи во Лигата на шампионите. Англискиот репрезентативец ја мина втората половина од минатата сезона на позајмица во Астон вила, но засега клубот од Бирмингам не презел конкретни чекори за продолжување на неговиот престој на „Вила парк“.
Од друга страна, Манчестер јунајтед очигледно нема да смета на него додека тимот е воден од Рубен Аморим.
Според англиските и шпанските медиуми, голема желба на Рашфорд е трансфер во Барселона, но каталонскиот клуб го насочи своето внимание кон ангажман на Нико Вилијамс од Атлетик Билбао. Иако играчот на Црвените ѓаволи не смета дека тоа е пречка за негово доаѓање на „Камп ноу“, бидејќи може да игра на сите позиции во нападот, раководството на Барселона засега не започнало никакви разговори за евентуален трансфер.
Менаџерот на Њукасл, Еди Хау, сака да го има Рашфорд во својот состав, но не како замена за Александер Исак, кого се надева дека ќе го задржи на „Сент Џејмс парк“, туку како играч кој ќе се ротира со шведскиот напаѓач, имајќи предвид дека тимот следната сезона ќе настапува во Лигата на шампионите.
Њукасл би сакал да го доведе Рашфорд на позајмица, но Манчестер јунајтед претпочита постојан трансфер.
Се зголемува и веројатноста 33-годишниот Калум Вилсон да го напушти клубот летово, па Еди Хау има потреба од дополнителни напаѓачки опции.
Во дресот на Астон вила, Рашфорд одигра 17 натпревари, постигна четири гола и забележа шест асистенции.
