Словенечкиот 22-годишен напаѓач Бенјамин Шешко потпиша за Манчестер јунајтед, клубот ќе плати фиксна отштета од 76,5 милиони евра за трансферот од Лајпциг, а со бонусите, таа сума може да се искачи и на 85 милиони.
Сепак, германскиот клуб нема да ја добие целата сума, помал, но за нив значаен дел ќе добијат и словенечките клубови, прволигашот Домжале и второлигашот Кршко.
Шешко од Домжале замина во Салцбург пред шест години за 2,5 милиони евра, а сега Домжале ќе инкасира околу 1,5 милиони евра од неговата продажба од Лајпциг во Јунајтед благодарение на клаузулата за процент од идните продажби, и дополнителни 380.000 евра, кои доаѓаат од фондот за солидарност на ФИФА за развој на млади играчи. Доколку се исполнат некои од условите за активирање на гореспоменатите бонуси, заработката на словенечкиот прволигаш од трансферот на Шешко ќе биде повеќе од 2 милиони евра.
Пари ќе земе и словенечкиот второлигаш Кршко во чии младински категории играше Шешко. И тие имаат право на пари од гореспоменатиот фонд за солидарност на ФИФА кој е наменет за клубови кои учествувале во развојот на играч на возраст од 12 до 23 години. Пред да се пресели во Домжале во 2018 година, Шешко играше во младинските категории на Кршко.
Во сезоната 2017/18, во лигата за играчи до 15 години, Шешко постигна 59 гола во 23 натпревари за Кршко, објавуваат словенечките медиуми. Според „Трансфермаркт“, Домжале и Кршко би можеле да поделат околу 765.000 евра од фондот за солидарност. Доколку се вклучат и бонусите, износот што би го поделиле би можел да се зголеми на 850.000 евра. Кршко неодамна испадна од првата лига, но овој огромен приход претставува не само голема утеха за нив, туку и гаранција за постабилна иднина.
