Сопствениците на Манчестер јунајтед, американското семејство Глејзер, ја одби третата и последната понуда на катарскиот шеик Јасим бин Хамад ал Тани, вредна пет милијарди фунти, бидејќи сакаат милијарда повеќе, пишуваат англиските медиуми.
Медиумите пишуваат и дека катарскиот шеик понудил да ги купи сите 100 отсто акции и згора на тоа ветил инвестирање на големи средства во реновирање на стадионот и за засилувања на екипата.
Вчеравечер понуда достави и вториот заинтересиран за купување на Манчестер јунајтед, сер Џим Ретклиф, но неговата понуда била да купи 50 отсто од акциите и можност браќата Џоел и Аврам Глејзер да ги задржат своите 20 отсто од акциите. Но, и оваа понуда била одбиена.
Англиските медиуми пишуваат дека семејството Глејзер ќе го продаде Јунајтед за рекордни шест милијарди фунти, но Џоел и Аврам сакаат да ги задржат своите акции во клубот, додека останатите браќа Кевин, Брајан и Едвард,и сестрата Дарси, се подготвени да ги продадат своите акции.
