На осум здравствени работници ќе им се суди за нивната улога во смртта на легендарниот аргентински фудбалер Диего Марадона во 2020 година, одлучи Апелациониот суд во Аргентина.
Судот со Сан Исидро минатиот месец ги сослуша аргументите на осумтемина здравствени работници кои во 2022 година вложија жалба на обвинението за убиство и ја потврди претходната одлука.
Судот одбивајќи ја жалбата, одлучи дека неврохирургот и матичен лекар на Марадона, Леополдо Луке, психијатарот Агустина Косачов и уште шест медицински лица треба да се соочат со обвинение за „убиство со потенцијално отежнувачки околности“, односно за тешко кривичо дело според кое лицето намерно не реагира соодветно иако знае дека може да предизвика смрт.
Покрај докторот Лупе и психијатарката Косачов, на обвинителната клупа ќе седнат и координаторот за медицински сестри Маријано Перони, медицинските работници Рикардо Алмирон и Жизела Мадрид, психологот Карлос Дијас, како и Ненси Форлини и Педро Пабло ди Спања.
Адвокатите на одбраната во жалбената постапка побараа полесно обвинение, односно да бидат обвинети за „убиство од вина“ кое носи помала затворска казна (од една до пет години), но судиите Карлос Фабијан Бланко, Густаво Адријан Хербел и Ернесто Гарсија Мањон го потврдија обвинението што го подготвија обвинителите.
Доколку бидат прогласени за виновни, обвинетите се соочуваат со затворска казна од осум до 25 години зад решетки. Судскиот процес се очекува да започне во 2024 година.
Диего Армандо Марадона почина на 25 ноември 2020 година на 60-годишна возраст во Буенос Аирес.
