Фудбалската легенда Роналдињо ќе остане во домашен притвор во хотел во Асунсион, Парагвај, откако Апелацискиот суд ја отфрли жалбата со која Бразилецот и брат му побараа ослободување. Роналдињо и Роберто Асис се обвинети за поседување и користење фалсификувани лични документи.
Бившата ѕвезда на ПСЖ, Барселона и Милан и двократен најдобар светски фудбалер на годината мина повеќе од еден месец во затвор во Асунсион, а во април беше преместен во домашен притвор, во хотел со четири ѕвездички во главниот град на Парагвај, и таму го чека судењето.
Адвокатите на Роналдињо бараа судење по скратена процедура и да му се дозволи да го напушти Парагвај за да се врати дома во Бразил, но барањето е отфрлено. Роналдињо и брат му може да останат во куќен притвор максимум шест месеци.
