Сплитски Хајдук со полноќна трансфер-бомба се пофали со најновиот трансфер, веројатно и најголемиот во историјата на клубот. Иван Ракитиќ и официјално е нов фудбалер на Хајдук и следната сезона ќе игра во првенството на Хрватска.
Во Сплит се пофалија дека Ракитиќ ќе биде најтрофејниот фудбалер кој некогаш заиграл во хрватското првенство. Хрватот беше член на Ал-Шабаб од Саудиска Арабија, но само после шест месеци го раскина договорот и на 36-годишна возраст за првпат во кариерата ќе настапува за клуб од Хрватска.
Ракитиќ е роден во Швајцарија, па преку Базел и Шалке стигна до Севиља, а потоа и во екипата на Барселона. Во својата кариера има по еден трофеј од Лигата на шампионите, Светското клупско првенство и Супер купот на Европа, додека двапати со екипата на Севиља ја освојуваше и Лигата на Европа. На домашна сцена, по четирипати го освојуваше првенството и Купот на Шпанија, додека двапати го крена и трофејот од Супер купот на Шпанија. Има и по еден Куп трофеј и со екипите на Базел и Шалке.
Беше еден од клучните играчи во освојувањето на сребрениот медал на репрезентацијата на Хрватска на Светското првенство во Русија.
