Фудбалската федерација на Македонија и официјално го доби новиот, шестти претседател во историјата од независноста на Македонија. Масара Омерагиќ со акламација е избран за нов претседател од сите 62 присутни делегати на вонредното изборно собрание на ФФМ.
„Главни поенти ќе ни бидат враќање на легендите во структурите на ФФМ, потоа фудбал за секое дете, регуларно првентво, воведување на ВАР системот, подобрување на инфраструктурата, чесност и транспарентност. Вратата на ФФМ ќе биде отворена за сите кои сакаат да помогнат и имаат вистински идеи, но и нулта толеранција за корупцијата. Немам волшебно стапче, но имам добар тим и уште од утре започнуваме со работа.” – рече новиот претседател на ФФМ веднаш после изборот.
На собранието беа присутни сите 62 делегати, а говор одржаа и претставници на УЕФА и ФИФА, кои му се заблагодарија на досегашниот претседател, Муамед Сејдини, но и му честитаа за изборот на новиот претседател, Масар Омерагиќ.
Поранешниот фудбалер на Слога Југомагнат и Вардар доаѓа на чело на ФФМ како шестти претседател во независна Македонија, после Љубисав Иванов – Ѕинго, Ламбе Арнаудов, Харалампие Хаџи-Ристески, Илчо Ѓорѓиоски и Муамед Сејдини.
