Екипата на ГРК Охрид направи изненадување откако славеше над Алкалоид со 30:26 во 4. коло на ракометната Суперлига. Во салата „Билјанини извори“, домашниот тим одигра фантастичен меч и за прв пат во меч од елитното друштво успеа да го победи Алкалоид.
Уште од самиот старт ракометарите на ГРК Охрид заиграа одлично и по првото полувреме имаа убедливо водство од 16:9. Алкалоид второто полувреме го започна со три гола по ред и намали на 16:12, но тоа не ги збуни охриѓани.
Домашниот тим предводен од словенечкиот интернационалец ја одржуваше високата предност, па во 48 минута беше 23:17, а на седум минути до крајот резултатот беше 26:20.
Словенечкиот интернационалец Гал Цирар со 14 гола од кои седум од пенал, беше предводник во победничкиот тим. Одличен беше и голманот на Охрид, Даниел Ѓорѓески со 16 одбрани.
За Алкалоид ова е прв пораз сезонава. Ако се сметаат и мечевите од ланската сезона, скопјани имаа низа од 22 победи по ред и сега губат прв пат во првенството по пауза од речиси 11 месеци (во април минатата година загуби од Е. Пелистер дома со 27:28).
На табелата во Суперлигата, Еурофарм Пелистер сега е единствен со перфектен биланс и има 14 бодови. Алкалоид остана на 12 бодови, а Охрид сега се искачи на третото место на табелата со 11 бодови.
