Спорен момент во 96-тата минута го спречи новиот турски прволигаш Адана Демирспор да слави победа против шампионот Бешикташ, а главен виновник е италијанскиот репрезентативец Марио Балотели.
Според судијата Сансалан, но и експертите во ВАР-собата, Балотели иако не ја допре топката, му го попречувал видикот на голманот Дестаноглу при ударот на Акајдин, кој ја погоди мрежата на Бешикташ за 2:1, но голот беше поништен.
Домаќините протестираа, од трибините летаа и тврди предмети, но судијата Сансалан ја потврди одлуката дека нема гол што ја донесе со помош на ВАР-системот.
Мечот имаше драматичен финиш и по предноста на Бешикташ од 1:0 од 31-вата минута со голот на Тешеира, домаќините постигнаа гол за израмнување во 92-рата минута.
Стрелец беше Акајдин, кој потоа пак погоди, но голот во 96-тата минута му беше поништен поради Балотели.
