Арсенал не може да куртули од Месут Озил и мораше да му исплати 10 милиони евра бонус минатиот месец за лојалност, според важечкиот договор што го има со германскиот интернациналец.
Озил воопшто не игра за популарните Топчии, одби и понуда од Ал Наср вредна 5 милиони фунти и продолжи да го „дере“ Арсенал.
Месут пристигна во Лондон во 2013 година од Реал Мадрид за сума од 50 милиони евра за петгодишен договор и тогаш беше најскапиот германски фудбалер во историјата.
Во јануари 2018 година го продолжи договорот со Топчиите за рекордна неделна плата од 350 илјади фунти и уште еден мудар потег.
Во новиот тригодишен договор постои и клаузула за исплата на бонус за лојалност, ако Озил до 2021 година не ја примени средината и остане во Арсенал.
Во меѓувреме Месут е далеку од првиот тим и не игра, а Арсенал се обидува да го симне огромниот финансиски товар со плаќањето на над 20 милиони евра годишно за фудбалер што воопшто и не конкурира за настап во Премиерлигата.
