На 8-ми декември 1991 година, Црвена ѕвезда како актуелен еврпски првак, предводен од Македонците Дарко Панчев (прв стрелец) и Илија Најдоски (капитен), во Токио го победи јужноамериканскиот првак Коло-Коло од Чиле со 3-0 во Интерконтиненталниот куп и стана светски клупски шампион.
Денешниот датум е запишан со златни букви на најтрофејниот српски, а некогаш и југословенски фудбалски клуб.
„Беше прекрасно да се биде дел од таа генерација. Уште поубаво е да се биде еден од играчите кои беа носители на тие успеси. Речиси 50 години, Звезда беше меѓу најдобрите клубови во Европа. Многу пати беше на работ на голем успех. Нашата генерација успеа да стави шлаг на тортата што Звезда ја градеше со години. Со тој печат, ја вклучивме Звезда меѓу најголемите и бесмртни клубови. Мило ми е што бев дел од таа генерација“, изјави Панчев за официјалната веб-страница на клубот.
„Беше исклучителен натпревар. Малку нè вознемири, според мене неправеден, црвениот картон што го доби Савичевиќ, мислам дека беше навистина премногу суров. Сепак, бевме компактни и добри пријатели, се покажавме во најдобро светло кога, со играч помалку во второто полувреме, го дадовме својот максимум и успеавме да постигнеме уште два гола. Ретко е да се види тим со играч помалку во ваков последен натпревар да успее да постигне уште два гола“, рече Панчев кој даде еден гол во тој меч и стави точка на победата од 3-0.
„Мојот гол беше феноменална контра што започна од нашата задна линија, од каде што топката стигна до Југовиќ, а тој ја однесе прекрасно кон центарот. Во меѓувреме, почнав да спринтам за да отворам простор на левата страна за Михајловиќ, кој истрча во тој дел од теренот како брз воз. Кога повлеков двајца играчи кон мене, се отвори простор, Југовиќ добро го виде тоа и му ја додаде топката на Михајловиќ. Тој веднаш се повлече напред, а потоа остро на земја од другата страна стативата ме бараше. Топката помина покрај мрежата, а јас само ја потврдив таа прекрасна акција. Голот беше навистина убав и тоа беше печат на добрата игра што ја одигравме“, раскажа Панчев.
