Македонската фудбалска легенда и поранешен истакнат фудбалер на Црвена ѕвезда, Дарко Панчев, се осврна на настапите на српскиот првак во Лигата на шампионите. Тој потенцираше дека проблемот на Црвена ѕвезда е во тоа што немала среќа при ждребот, каква што имаше Динамо Загреб.
„Објективно, Ѕвезда имаше многу тежок жреб. По Барселона, доаѓа одличниот Штутгарт. Ѕвезда дефинитивно немаше среќа како на пример Динамо Загреб, на кој му се падна да игра со Салцбург и со Слован, кој веројатно е најслабиот тим во Лигата на шампионите. Ѕвезда припаѓа на таа група од десет до петнаесет екипи кои се под топ 20 во Лигата на шампионите. Ни Ѕвезда, ни тие останати екипи од таа група не се во состојба да се борат со посилните“, смета Дарко Панчев.
Тој истакна дека и слабото домашно првенство е еден од проблемите на српскиот шампион.
„Тоа не е никаква тајна. Слабата лига е голем проблем за сите наши екипи во регионот. Ќе видиме што ќе се случи понатаму, но објективно, тоа е така. Слабата лига е сигурно огромен минус кога доаѓаат натпревари во големите натпреварувања. Барса во моментов е во најдобра форма во Европа. Му даде на Реал четири гола на гости, четири на Баерн, пет на Ѕвезда. Дури и Ѕвезда успеа да даде два гола. Тешко е да се игра против Каталонците. Германецот Ханси Флик внесе нешто ново во тимот, пред сè ефикасност. На крајот и Ѕвезда влезе во нивната машина. Не треба многу да се разочаруваме поради тоа“, истакна Дарко Панчев, кој му даде поддршка на тренерот Владан Милоевиќ.
„Не би сакал да филозофирам околу проблемите во тимот, тоа најдобро го знае Милоје. Точно е дека е потребно време тимот да се воигра, особено кога ќе се донесат неколку нови играчи. Што се однесува до засилувањата, мислам дека е рано и дека треба да помине уште време за да можеме да оцениме за грешките и погодоците при трансферите“, заклучи поранешниот европски првак со Црвена ѕвезда.
