Горан Пандев веќе шест месеци е спортски директор на репрезентацијата, а за „ФутМоб“ зборуваше за предизците кои се исправени пред нив, но и за причините поради кои прифати да биде дел од тимот на новиот претседател на ФФМ, Масар Омерагиќ.
„По многу години гордо носење на дресот на репрезентацијата, се чувствував почестен што бев поканет од Масар Омерагиќ да бидам дел од новото раководство на Фудбалската федерација на Македонија. Ја прифатив поканата бидејќи верувам дека е потребно да се поттикнат промени со цел да се подигне нивото на македонскиот фудбал на многу повисоко ниво. Искрено, се надевам дека ќе го исковаме вистинскиот пат во наредните години за следната генерација да продолжи со нашата работа, иако знаеме дека тоа нема да биде лесна задача, но сме оптимисти. Претседателот, Омерагиќ, неуморно работи на предизвиците со кои се соочуваме, но со нашето знаење и поддршка се надеваме дека ќе се подобриме“, вели Пандев.
Познато е дека Пандев во минатото имаше несогласувања со сегашниот селектор на репрезентацијата Благоја Милевски, но како што вели нашиот најдобар фудбалер во историјата, односот помеѓу нив двајца во моментов е професионален, а целта заедничка – пласман на Светско првенство.
„Би го опишал нашиот однос како професионален. Тој е актуелен селектор на репрезентацијата, а новото раководство предводено од претседателот Омерагиќ му даде целосна поддршка. Исто така, добро ги започна квалификациите за Светското првенство 2026 и се надевам дека ќе нè направи среќни и ќе нè води до нашето прво Светско првенство. Сепак, тој е оној што ја одлучува својата судбина бидејќи резултатите се огледало на работата на тренерот и му посакувам многу среќа.“
Што се однесува до главните предизвици, според Пандев, најмногу проблеми во моментов има во младинските категории, но вели дека работата и во тој дел тргнува во позитивна насока.
„Најголемите загрижености се поврзани со младинските категории бидејќи ако лошо управуваме со младите, едноставно не можеме да очекуваме да имаме квалитетен сениорски тим. Промената на тренерите во младинските категории е добра почетна точка бидејќи имаме поинаква визија, а Ѓорги Христов е оној што е задолжен бидејќи има богато искуство во оваа област. Искрено, не сум многу запознаен со младинските категории бидејќи играв во странство во последните 25 години и дури сега дознавам повеќе за нив. Најважно е што назначивме професионални тренери кои ќе им дадат шанса на талентираните играчи кои навистина заслужуваат да го носат дресот на националниот тим и тоа е нашата главна цел. Ние сме мала земја и немаме 100 талентирани играчи од кои можеме да избереме, но денес имаме младински категории почнувајќи од 15 години па нагоре, а во мое време тоа не беше случај. Тие имаат тренинг-кампови секој месец и со напорна работа можеме да развиеме играчи кои ќе бидат подготвени да играат за сениорите во иднина. Како што реков, нема да биде лесно и ќе биде потребно време бидејќи лошото управување трае со години и тоа се гледа од лошите резултати, но ни требаат и квалитетни тренери бидејќи талентот дефинитивно е тука и се надеваме дека можеме да ја направиме иднината подобра“, вели Горан Пандев.
