Некогашниот сенегалски фудбалер Папа Буба Диоп, кој почина на 42-годишна возраст, беше погребан во родната земја со сите државни почести, нешто што досега се немаше случено. Буба Диоп кој е најпознат по постигнувањето на победничкиот гол на отворањето на СП во 2002 против тогашниот актуелен првак Франција, со националниот тим на тој Мундијал дојде до четвртфинале.
Претседателот на Сенегал, Маки Сол, беше меѓу говорниците на погребот и рече дека смртта на Папа Буба Диоп е ненадоместлива загуба за нацијата, бидејќи тој го постави Сенегал на светската фудбалска мапа.
Диоп во 2002 играше и во финалето на Африканскиот куп на нации, кога загубија од Камерун на пенали. Тој играше во француски Ленс, и во повеќе англиски премиерлигаши, во 2008 со Портсмут го освои ФА купот. Почина во Ленс, од АЛС, болест која стана попозната во светот откако со неа се разболе и Стивен Хокинг.
