Екипата на Парма денеска одигра нерешено 1:1 на гостувањето кај Бари во меч од 36 коло на Серија Б, но и тоа беше доволно за популарните Млекари да слават враќање во елитното фудбалско друштво во Италија за следната сезона.
Парма за неколку месеци сигурно ќе игра во Серија А бидејќи на две кола до крајот од втората лига, овој тим е лидер со 74 бодови и има дури седум повеќе од Венеција која е трета. Првопласираните две екипи од Серија Б директно обезбедуваат место во Серија А, што значи дека Парма веќе може да се радува.
Овој култен клуб во Италија е омилен на многу фудбалски романтичари кои се сеќаваат и на времето кога Парма освојуваше и европски трофеи. Парма може да се пофали со два трофеи во Купот на УЕФА и еден во Купот на куп победници.
Во блиското минато Парма многу се мачеше. Поради финансиски проблеми, пред 10-тина години прогласи банкрот и згасна, за да потоа во 2015 година Парма повторно се формира и заигра во најдолната лига. Во следните три сезони постојано одеше во повисок ранг и стана првиот клуб кој за три сезони по ред успеал од најниската лига да дојде до Серија А.
Во Серија А играше до сезоната 2020/21 година кога во 38 меча имаше само три победи и повторно испадна во понизок ранг. Минатата сезона во доигрувањето не успеа да се врати во Серија А, но сега фановите на овој клуб веќе го слават враќањето во елитното друштво.
soon .. pic.twitter.com/meL7bJLxWG
— Parma Calcio 1913 (@ParmaCalcio_en) May 1, 2024
