Битолскиот Пелистер ќе биде македонскиот претставник во квалификациите за кошаркарската Лига на шампиони, но доколку не успее да се пласира во групите, ќе продолжи со настапите во второто по ранг натпреварување, Европскиот куп на ФИБА.
Таму Пелистер би играл директно во групната фаза, а денес беше извршена и ждрепката, по која битолчани добија група по мерка за одличен пласман. Во групата „Д“ друштво ќе им прави екипата на Петриоти Левице од Словачка, која исто така игра во квалификациите за Лигата на шампионите, а сигурни учесници се Цедевита јуниор од Хрватска и Керавнос од Кипар.
