Српската кошаркарска репрезентација доби огромен удар на Евробаскет, капитенот Богдан Богдановиќ нема да игра до крајот на турнирот. Од Кошаркарскиот сојуз на Србија официјално ја потврдија лошата вест. Повредата на задната ложа, здобиена во дуелот со Португалија, е посериозна од очекуваното и бара најмалку еден месец пауза.
Богдановиќ, кој заедно со Никола Јокиќ важи за најважен играч на Србите, прво го пропушти натпреварот со Латвија, но се надеваа дека ќе биде подготвен за продолжението од турнирот. Деталните прегледи, сепак, покажале руптура на мускулот и крај на настапот на шампионатот.
Дополнителна искра на незадоволство запали одлуката на ЛА клиперс, клубот на Богдан Богдановиќ, кој инсистира тој веднаш да замине за Америка и таму да го започне процесот на рехабилитација. Тоа особено го налути селекторот Светислав Пешиќ, кој сака капитенот да остане со тимот, макар и повреден, заради атмосферата и лидерската улога.
Србија до крајот на групната фаза ќе се сретне уште со Чешка и Турција, а токму дуелот со Турците во последното коло ќе одлучува кој ќе го освои првото место во групата А.
