Барселона за првпат по многу години ја нема во нокаут-фазата од Лигата на шампионите откако каталонскиот гигант сега заврши како третопласиран во својата група. Иако Барселона ја нема во елитната лига на УЕФА, осми март е датум кој се памти токму по Барселона.
На овој ден точно пред пет години, на „Камп ноу“ играа Барселона и Пари Сен Жермен во реваншот од осминафиналето. Францускиот тим имаше предност од 4:0 по првиот меч, но Барселона предводена од Лионел Меси, Луис Суарес и Нејмар веруваше во чудо.
Домаќините одлично започнаа и поведоа со голот на Суарес, додека Курзава си даде автогол. На почетокот на вториот дел, Меси од пенал зголеми на 3:0, но потоа ПСЖ даде гол преку Единсон Кавани и намали на 3:1. Тоа значеше дека Барселона мора да даде уште три гола ако сака да направи чудо.
До 88-мата минута беше 3:1, а потоа Нејмар со фантастичен гол од слободен удар зголеми на 4:1. Во 90-тата минута повторно Нејмар од пенал зголеми на 5:1. Се играа последните секунди од мечот кога Серџи Роберто даде гол во 90+5 минута за неверојатни 6:1 и пласман на Барселона во четвртфиналето од Лигата на шампионите.
