Жарарт Пике и Кристијано Роналдо некогаш делеа иста соблекувална во Манчестер јунајтед пред да станат големи ривали во Шпанија. Сега поранешниот дефанзивец на Барселона навести дека нивните патишта би можеле повторно да се вкрстат – и тоа во сосема поинаков контекст.
Каталонската легенда потврди амбициозни планови за проширување на Kings League, вклучувајќи старт во Португалија и потенцијална соработка со ѕвездата на Ал-Наср.
Kings League (Кралската лига) – иновативното фудбалско натпреварување со седуммина играчи, создадено од Пике во 2023 година – влегува во нова фаза на глобален развој. За време на пренос во живо на социјалните мрежи, поранешниот играч на Каталонците и Црвените ѓаволи откри дека лигата ќе претрпи значајни промени во структурата и локациите, при што Португалија е еден од приоритетните пазари за интернационализација.
„Ќе го видите тоа во наредните месеци. Намерата ни е да се прошириме во други земји – интерес има,“ изјави Пике. „Нашиот модел е поинаков од самиот почеток. Веќе работиме во девет лиги. Идејата е во новите земји лигите да ги водат локални компании под брендот ‘Кралска лига’. Тоа ја исклучува САД од овој конкретен модел.“
Споменувањето на Португалија веднаш го стави Роналдо во фокусот. Пике, кој добро го познава од времето на „Олд Трафорд“, не ја исклучи можноста за соработка, што би предизвикала голем интерес во спортската јавност.
На прашањето дали Роналдо би можел да биде дел од португалската верзија на лигата, Пике одговори со мистериозна насмевка: „Го имам неговиот контакт…“. Иако не откри детали, оваа изјава беше доволна да ја разбуди фантазијата кај фановите.
