Пјуник ќе има македонски адут за двомечот со Шкупи во стартното квалификациско коло за настап во Европа Лигата. Поранешниот наш младински репрезентативец Антонио Станков потпиша за ерменскиот клуб и ќе има право да настапи на 11. и на 18. јули против Шкупи.
„Се радувам што пристигнав во клуб со големи амбиции. Пјуник е класа клуб што ќе ми овозможи да играм и во квалификациите за Европа Лигата. Се надевам дека ќе се пласираме во фаза по групи. И ерменската лига напредува постојано“, изјави Станков.
Антонио има 20 настапи за македонската млада селекција за играчи до 21 година, а во Пјуник пристигна од холандскиот второлигаш Дордрехт.
Пјуник на 11. јули ќе му биде домаќин на Шкупи, а реваншот е во Скопје седум дена подоцна.
