Спортманија во Гевгелија
Кошаркарската машка А репрезентација на Македонија, и со драстично подмладен состав ја совлада Швајцарија со 62-56 во првиот од двата пријателски меча.
Селекторот Марјан Илиевски на располагање имаше 17 играчи, претежно млади, без преголемо искуство во А репрезентацијата, но борбени до максимум и желни за докажување. На моменти на паркетот имавме и петорка во која најстариот беше роден 2001 година.
Во почетната петорка беа Магдевски, Митревски, Мекиќ, Андоноски и Какруки. Во првата четвртина македонската селекција се мачеше во нападот, но губеше само со 11-15, што и не делуваше така лошо.
Во вториот квартал Македонија заигра многу поефикасно, Андреј Митревски погоди три тројки, па на пауза заминавме со позитива од 36-30.
Како клучна се покажа третата четвртина во која подмладената селекција на Македонија направи и 20 поени разлика (53-33 во 27-ма минута, на што гостите одговорија со серија од 9-0.
Шутерски расположениот Митревски со 15 поени беше најефикасен во редовите на Македонија, натурализираниот Џејкоб Вајли даде 13, и тие двајца беа единствените со повеќе од 6 поени.
Втората контрола е закажана за утре во истото време од 19 часот, на истото место, во салата „НБ Ноел“ во близината на Гевгелија.
