Луиџи Џиџи Рива, најдобриот стрелец во историјата на италијанската репрезентација, почина денеска, објавија медиумите од оваа земја.
Изминатиот викенд на Рива му се слошило во неговиот дом во Сардинија и поради сомнежи за проблеми со срцето, бил пренесен во болницата „Сан Микеле“ во Калјари, а денеска ја загуби најважната битка во животот.
Луиџи Џиџи Рива речиси целата фудбалска кариера ја помина во тимот на Калјари и беше најдобар стрелец во Серија А во 1970 година, кога тимот од Сардинија ја освои единствената титула во клупската историја.
Рива беше дел од репрезентацијата на Италија која триумфира на Европското првенство во 1968 година, а исто така беше дел од Аѕурите кои во 1970 година играа во финалето на Светското првенство во Мексико.
Кариерата ја заврши во 1976 година, а за Калјари постигна 164 гола на 315 натпревари и трипати беше најдобар стрелец во Серија А. За италијанската репрезентација настапи на 42 натпревари и постигна 35 гола.
По завршување на кариерата, дури 25 години беше директор на италијанската репрезентација, а од 2019 година беше именуван за почесен претседател на Калјари.
